दशैं तिमीसँग मेरो गुनासो छ

हो, दशैँ तिमिसंग मेरो ठूलो त नभनौ सानै गुनासो छ । तिमीले परिवर्तन गरेको रुपसँग गुनासो छ, तिम्रो आधुनिकतासंग गुनासो छ । आज तिमी मेरो गुनासो मात्र सुन, म सबै भन्न चाहन्छु मन हलुङगो पार्न चाहन्छु, सबैसंग गुनासो साटेर हलुङगो हुन चाहन्छु । तिमीले सुन्दिन भन्न पाउदिनौ किनकी ममा यी सबै गुनासो आउनुमा तिम्रै हात छ, तिमीले वतावरण बनाईदिएका छौ त्यसैले सम्पूर्ण रुपमा तिमी नै जिम्मेवार छौ ।

तिमी असत्यमाथि सत्यको विजय भएको किम्बदन्ती बोक्ने पर्व हौ । तिमी सबैलाई एकै सुत्रमा बाधेर हर्षित बनाउँछौ, तिमी कति महान छौ । तिमीले सबै गाउँघरमा, सहर बजारमा, टोल टोलमा, पाखामा अनी भन्ज्याङमा हिमालमा, पाहाडमा अनी तराईमा सबैतिर हर्सोल्लास छरिदिन्छौ ।

वर्षौ वर्ष भेट नभएका दाजुभाई, दिदीबहिनीहरु, बुबाआमा. फुपू, फुपाजु अनि सबैलाई भेट गराउँछौ अनि थापिदिन्छौ खुसि, थापिदिन्छौ उम्मंग । वर्षौ वर्ष मुग्लान बसेका दाजुभाईलाई बिदेसिनु परेको पीडा, आफन्तसँगको वियोगको पीडा सुनिदिन्छौ । बिदेसिएका छोराछोरीको पर्खाई अन्त्य गरिदिन्छौ, श्रीमानसँग छुटिनु परेको वियोगको पीडा कम गरिदिन्छौ ।

हरेक गाउँगाउँका केटाकेटीमा अनेक थरी कुरा गरेर, रंग भरेर हर्सोल्लास थपिदिन्छौ । तिमीसँग केटाकेटी, युवायुवती, बूढाबुढी , धनी, गरिब , बाहुन , क्षेत्री, मगर, गुरुङ, काला गोरा, बिरामी, रोगी अनी सबैलाई खुसी बनाउने क्षमता छ । तिमी कति धन्य छौ, तिमी सबैका भगवान नै हौ भन्दा नि फरक नपर्ला । तिमीसँग जादुको छडी नै छ भन्दा पनि फरक नपर्ला । तिमीसँग के पो छैन, सबै छ । तिमीले गाउँमा पिङ हालिदिएका छौ । चंगा उडाउन सिकाएका छौ । यी सबै वातावरणमा अहो केटाकेटी कति खुसी छन्, मलाई स्वयम केटाकेटी भएर प्रस्तुत हुन मन लाग्छ ।

अहो तिमीसँग सबै छ, छ भन्नु भन्दा पनि थियो भनौ जस्तो लाग्यो मलाई किनकी तिमीले आजभोलि अनेक रुप फेरेका छौ । हर्षित बनाउने नाममा तिमीले खोक्रो, देखावटी खुसी मात्र दिएका छौ । तिमीले आफूलाई धेरै परिवर्तन गरेका छौ । तिम्रो यो आधुनिकतासँग मलाई गुनासो छ । मलाई तिम्रो नाममा मेरो घरमा, समाजमा अनि मेरो देशमा भएका बिकृतिसँग गुनासो छ, ति सबैको सिर्जना गर्ने तिमी नै, तिमीले नै यस्तो वातावरण बनाएका छौ ।

मलाई तिम्रो नाममा मेरा बुबाआमा, दाजुभाई, दिदीबहिनीबीच झगडा पार्ने, तिम्रो रुपसंग गुनासो छ । गाउँगाउँमा तिम्रा नाममा हुने, चोरी डकैतीसँग गुनासो छ । गाउँका दाजुभाईलाई, जाँड रक्सी खाएर होहल्ला गर्ने अनि गाउँको वातावरण नै कोलाहल गराउने रुपसँग गुनासो छ । जुवा तास खेलाउने अनि आफ्नो सम्पत्ति सखाप पार्ने, श्रीमतीलाई जुवाको खालमा बाजी राख्ने अनि सारा जिन्दगी नै सखाप पार्ने रुपसँग गुनासो छ । बालबालिका तथा युबवायुवतीलाई जाँडरक्सी खान सिकाउने, जुवातास खेल्न सिकाउने, होहल्ला गर्न सिकाउने अनि यी सबैको प्राप्तिका लागि चोरी गर्न पनि सिकाउने, काटमार गर्न सिकाउने, झै–झगडा गर्न सिकाउने रुपसँग गुनासो छ ।

पल्लाघरका दाजु र तल्ला घरका दाजुबीच दशैं मनाउने नाममा हुने अनेक असन्तुष्टिसँग गुनासो छ । उपल्ला घरका दाजुले जुवातास खेलेर, जाँडरक्सी खाएर भाउजुको मुटु नै छियाछिया हुने गरि पिट्ने, गाली गर्न सिकाउने तिम्रो रुपसँग गुनासो छ । पल्लो गाउँकी काकीले श्रीमानबाट खाएको पिटाई आदि आदिसँग गुनासो छ । दशैं तिमीसँग मेरो गुनासो छ ।

धनीका घरमा प्रशस्त पकाईदिने, नयाँ लुगा किनिदिने, पिङ राखिदिने, खसी ढालिदिने सबैजनालाई खुसी तुल्याउने तर गरिबका घरमा केटाकेटीलाई रुवाबासीमा पार्ने, भोकभोकै पार्ने, नयाँ होईन पुरानै लुगा पनि सात ठाउँमा टालेको लगाएर बस्नु पर्ने, मन खिन्न बनाईदिने रुपसँग गुनासो छ ।

भर्खर केहि हप्ता अगाडि हाम्रो देशमा आएको प्राकृतिक प्रकोपले वियोगमा परेका, आफन्त गुमाएका अनि आकाशको छानोमा भोकभोकै दिनरात काट्नेहरुका घाउमा नुनखुर्सानी छरिदिएका छौ तिमीले, उनीहरुलाई अभाबै अभाब दिएका छौ, अरुलाई दशैं आउँदा उनीहरुमा झन पीडा थपिएको छ, घाउ झन् दुखेको छ, चर्केको छ, दशा आएको छ । केटाकेटी भोकभोकै कराईरहेका छन् ।

तिम्रै समयमा बजार अस्तव्यस्त छ, कालोबजारीको कुनै सीमा नै तोकेका छैनौ तिमीले, घुसखोरीलाई पनि बढावा दिएका छौ । सबै सामानको मूल्य आकाशिने गराएका छौ । कृतिम अभाब सिर्जना गरेका छौ । बलात्कारका घटना तिमी नजिकिँदा बढ्दा छन् । उनि कति पिडामा छिन् म महसुस त के कल्पनासम्म पनि गर्न सक्दिन ।

के के हो के के गराएका छौ म शब्दमा सबै प्रस्तुत गर्न सक्दिन । किनकी मेरो फितलो प्रस्तुतिले झन् पीडा थपिदिन सक्छ । तिमीले जे गर्नेलाई पनि छुट दिएका छौ, कसैलाई पनि कारबाही गर्दैनौ । तिमी आएका बेला कति असुरक्षा बढेको छ । तिमीलाई रत्तिभर पनि वास्ता छैन । गाउँका झ्याउरे भाका तिमीलाई मन पर्दैन । दोहोरी गीत पनि तिमीलाई पन पर्दैन, तिमीलाई त खाली डिस्को मन पर्छ । त्यहाँका नांगा नाच मन पर्छ, मलाई यी सबैसँग गुनासो छ ।

तिम्रो नाममा हुने यी सबै बिकृति मलाई स्वीकार्य छैन, खुसी दिने नाममा पीडा नथपीदेउ । चाहिएको छैन तिम्रो यी आधुनिक रुप तिमी पहिलेकै अबस्थामा आईदेउ । सबैलाई भाईचाराको भाव सिर्जना गराईदेउ, एकै मालामा बाँधिदेउ । कसैलाई खुसी, कसैलाई दुःखी नपारिदेउ । सबैको मन सन्तुष्ट पारिदेउ । अन्त्यमा सबै नेपाली दाजुभाइ, दिदीबहिनी, बुबाआमा सबैलाई दसैको लाखौ लाख शुभकामना । सबैको घरमा सुख शान्ति अमनचयन छाओस ।